١١ يوليو ٢٠٢٥
سيدات مصر

أطلقت مبادرة سيدات مصر لتمكين المرأة حملة “أمانكِ الرقمي حقكِ” بهدف توعية النساء والفتيات بحقوقهن في الفضاء الرقمي، وكيفية حماية أنفسهن من التهديدات والمخاطر المتزايدة على الإنترنت، مثل الاختراقات، التحرش، والابتزاز الإلكتروني. ففي السنوات الأخيرة، ازدادت حوادث العنف الرقمي التي تستهدف النساء، خاصة من خلال اختراق الحسابات وسرقة الصور أو استخدام المحادثات الخاصة للضغط والابتزاز. ورغم خطورة هذه الممارسات، لا تزال هناك فجوة كبيرة في وعي الكثير من الفتيات والسيدات بكيفية التعامل مع هذه التهديدات، أو حتى التصرف السليم في حال التعرض لها.

الكثير من الضحايا لا يتحدثن خوفًا من اللوم أو العقاب، بل أحيانًا من نظرة المجتمع أو ردة فعل الأسرة. هذا الصمت لا يحمي، بل يزيد من الخطر، وقد يؤدي إلى تدهور الحالة النفسية، أو الشعور بالذنب، أو الانعزال، وقد يصل الأمر إلى الإيذاء الذاتي أو حتى الانتحار. من هنا جاءت أهمية الحملة، التي لا تهدف فقط إلى التوعية، بل تسعى إلى دعم كل امرأة وكل فتاة، وتشجيعها على أن تطالب بحقها في الأمان، وأن تعرف كيف تحمي نفسها.

الحملة تركّز على تعليم النساء والفتيات كيفية حماية حساباتهن من الاختراق، من خلال خطوات بسيطة مثل اختيار كلمات مرور قوية، وتفعيل خاصية المصادقة الثنائية، وعدم قبول طلبات الصداقة من غرباء، وتجنّب فتح الروابط المشبوهة التي قد تصل عبر الرسائل أو البريد الإلكتروني. كما تسعى الحملة إلى نشر المعرفة حول كيفية التصرف في حال التعرض لموقف عنف أو ابتزاز رقمي، وتشجع على الإبلاغ وطلب المساعدة، بدلًا من الشعور بالخوف أو العار.

“أمانكِ الرقمي حقكِ” تذكّر كل فتاة وسيدة أن وجودها على الإنترنت لا يعني التنازل عن خصوصيتها أو أمنها. من حق كل امرأة أن تستخدم التكنولوجيا بحرية وأمان، وأن تعبر عن نفسها دون خوف. ومن حقها أن تعرف كيف تتعامل مع من يحاول اختراق هذا الأمان أو التعدي عليه.

الحملة تشمل أيضًا ورش عمل، ومواد توعوية رقمية، وفيديوهات تعليمية، ومحتوى مبسط يتم نشره على وسائل التواصل الاجتماعي، بالإضافة إلى التعاون مع جهات متخصصة لتقديم الدعم النفسي والقانوني لمن تتعرض لأي نوع من التهديد أو العنف الرقمي.

الرسالة الأساسية التي تسعى الحملة لإيصالها هي أن الأمان الرقمي ليس رفاهية، بل هو حق أساسي لكل فتاة وسيدة. لا يجب السكوت عن أي شكل من أشكال الابتزاز أو التحرش الإلكتروني. التوعية هي الخطوة الأولى للحماية، والكلام والمطالبة بالحق هما بداية الطريق لاستعادة الأمان.

مخاطر الإنترنت حقيقية مش هزار 

لما البنات بقت بتنتحر بسبب الإبتزاز الإلكتروني اللي بيتعرضوا له، ده معناه ان مخاطر الإنترنت حقيقة مش هزار.

العنف الإلكتروني ضد الستات والبنات ليه آثار نفسية واجتماعية ومادية واقتصادية، لكن أكتر حاجة بتظهر هي الآثار النفسية اللي بتحس بيها معظم الستات اللي بيتعرضوا للعنف الإلكتروني. ومن أكتر الآثار النفسية دي هو الخوف والتوتر من الفضيحة وتشويه السمعة. كمان في ستات بيعانوا من الأرق ونوبات الهلع والإحساس بالإهانة، و بينسحبوا من حياتهم الاجتماعية. وفي بعض الأحيان، الضغط النفسي الناتج عن العنف ده بيوصل بعض الستات أو البنات لمحاولة الانتحار أو إيذاء نفسهم.

بس الحل كمان مش إن إحنا نلغي حساباتنا أو نبطل نستخدم الانترنت. 

عشان كده مهم جدا اننا نحمى نفسنا على الإنترنت، من خلال تأمين حساباتنا على مواقع التواصل الاجتماعى، وكمان نعرف ازاى نتعامل مع اى مجرم قدر يخترق حساباتنا وبيهددنا.

حسب إحصاءات وزارة الاتصالات، فان عدد مستخدمي الإنترنت في مصر “الثابت والمحمول” زادت عن الـ 72.87 مليون مستخدم في نهاية يوليو 2021. وعدد السيدات اللى بستخدم الانترنت فى مصر وصل حوالى لـ  30مليون.

ده معناه إن في حوالي 30 مليون سيدة وشابة وطفلة في مصر معرضات للعنف والتحرش الإلكتروني.

هل تعرضتى للابتزاز الرقمي قبل كده؟ 

المضايقات الإلكترونية لها أشكال كتيرة، منها التنمر والابتزاز والتشهير.

التنمر الإلكتروني هو من أكتر المضايقات اللي بيتعرض لها مستخدمي الإنترنت. وبيكون في صورة انتقاد سلبي وسخرية وتشويه سمعة وإساءه ونشر أكاذيب وارسال تهديدات مؤذية؛ والتنمر الإلكتروني بيعرض الضحية للشعور بالأذى والإهانة والإحراج.

أما التشهير والإبتزاز دول بيتمثلوا في تهديد وترهيب الضحية بنشر صور أو مواد فيلميه (فيديوهات) أو تسريب معلومات خاصة بها لتسوية حسابات، أو التهديد بالعنف وتخويف الضحية لإجبارها على دفع مبالغ مالية أو استغلالها للقيام بأعمال غير مشروعة. في أحيان كتيرة بيكون المجرم عارف الضحية اللي بيبتزها.

اختراق الحسابات و سرقة البيانات الشخصية 

اختراق الحسابات و سرقة البيانات الشخصية اللى اصبحت النهاردة تجارة رائجة بيحقق منها الهاكرز مكاسب شخصية أو مالية ضخمة! 

مفيش حد فى امان، وكل الحسابات بتتعرض للاختراق والسرقة، من الأعمال التجارية والشركات الكبيرة وحتى الحسابات الشخصية.  والسبب: 

⭕️ سرقة بيانات العملاء وتسريبها

⭕️ معرفة حسابات البنوك الشخصية ومحاولة الاستفادة من الخدمات البنكية أون لاين.

⭕️ معرفة أسرار شغلك الخاص.

⭕️ سرقة صورك وإنشاء حسابات مزيفة وطلب الصداقة من أصدقائك عشان يطلبوا منهم فلوس.

⭕️ معرفة أسرارك الشخصية أو استخدام صورك الخاصة وتهديدك بطريقة ممكن تسبب لك أذى علشان تدفعى لهم فلوس

⭕️ وبعض الهاكرز يقوموا بسرقة البيانات لتحقيق أهداف شخصية أو 

⭕️ عشان كده تأمين حساباتكم مهم جداً لتجنب محاولات الاختراق.

إزاي تتصرفي لو تعرضتى للتهديد أو الابتزاز؟

أهم شيء لو تعرضي للابتزاز أو التهديد بنشر بياناتك الشخصية أو صور خاصة لكي، هو إنك تتصرفي بهدوء ومتخافيش، لأن المجرم بيعتمد على خوفك علشان ينفذ الجريمة؛ 

⭕️ أطلبي المساعدة من شخص موثوق فيه

⭕️ خذي صورة الـ screenshot من التهديدات اللي وصلتك، وبلغي الجهات الرسمية على طول (مباحث الإنترنت) مع تقديم صور الـ screenshot واللي تعتبر أدلة تقدري تستخدميها بشكل قانوني ضد المجرم. 

⭕️ لا تستجيبى للمبتز سواء بإرسال أي أموال له أو تنفيذ طلباته أو مشاركة أي أسرار شخصية عنك.

إختيار كلمة سر password قوية هي أول وسيلة بنقدر نحمي بيها بياناتنا وحساباتنا من انها تتعرض للإختراق (الهاكينج) 

⭕️ ازاى تختارى كلمة سر قوية؟ 

⭕️ استخدمي دائما خليطاً من الأحرف والأرقام والرموز 

⭕️ وكل ما تكون طويلة كان افضل (متقلش عن ١٦ حرف) Dg1@-XF-$OL?2639

⭕️ استخدمى كلمة سر مختلفة لكل حساب علشان لو حصل اختراق لحساب، الهاكر ميقدرش يوصل لباقي الحسابات.

 ⭕️ بلاش تستخدمي معلومات شخصية فى كلمة السر، يعنى بلاش رقم تليفونك ولا عيد ميلادك ولا اسماء اولادك 

⭕️  بلاش تستخدمى الكلمات الشائعة زى “password”, “iloveyou”, الخ.

⭕️ بلاش تستخدمى التسلسل (زى: abcd1234) أو الحروف اللى ورا بعض على الكيبورد (زى qwerty).

⭕️ غيرى كلمة السر باستمرار

⭕️ متنسيش تكتبيها في مكان آمن بحيث تقدرى تلاقيها بسرعة وقت ما تحتاجى لها

ازاى تحمى اجهزتك من الاختراق؟

⭕️ متضغطيش على اى لينك يوصلك فى ايميل او الانبوكس، مهما كان عنوانه مغرى انك تفتحيه، وحتى لو اللى بعته اعز أصحابك! 

⭕️ مش حتفتحيه مش علشان مفيش ثقة فى أصحابك، لكن علشان مفيش ثقة فى اللينك اللى وصلك! ممكن 

 حساب  اعز أصحابك ممكن بكون تم اختراقه وانتى مش عارفة، واللينك بعته الهاكر.

⭕️ لو اللينك من فيس بوك بيكون مكتوب عليه فيس بوك، وبيكون باين معمول له شير من اى صفحة.لكن اللينكات اللى فيها حروف وأرقام وعلامات، دى كلها خطر جدا. 

🔴 طيب ازاى جهازى بيتعرض لاختراق بسبب اللينكات دى؟ 

⭕️اللينكات الغريبة اللى بتوصل فى الانبوكس دى بيبعتها الهاكر، واول ما تدوسي عليها حسابك بيتم اختراقه. والحساب بيقع فى ايده، ويستولى عليه؛ و صورك وفيديوهاتك وقائمة اصحابك وللرسايل اللى بتبعتيها فى الانبوكس.

حماية اولادك على الانترنت بتحميهم وبتحميكى. 

⭕️ الأولاد ممكن يتعرضوا لمخاطر على الإنترنت بسبب كذا حاجة. 

⭕️ أولاً، الإنترنت مليان محتوى مش مناسب اللي ممكن يكون ضار للأطفال، زي المواقع العنيفة أو اللي فيها حاجات غير لائقة. ثانياً، الأطفال ممكن يتعرضوا للتنمر الإلكتروني، يعني يتعرضوا للإهانة أو السخرية من ناس تانية على السوشيال ميديا أو في الألعاب الإلكترونية.

⭕️ الأطفال ممكن يتعرضوا لمحاولات احتيال أو نصب، وممكن تهديد وابتزاز واستغلال. بعض الناس ممكن يحاولوا يخدعوا الأطفال عشان ياخدوا منهم على معلومات شخصية زي العنوان أو بيانات العيلة، او ارقام الكريديت كارد، واللى ممكن من خلالها اختراق اجهزتك او حساباتك البنكية. 

⭕️ وكمان قضاء وقت كبير على الإنترنت ممكن يأثر على الصحة النفسية والجسدية للأطفال، زي العزلة الاجتماعية، أو مشاكل في النوم، أو القلق والتوتر.

⭕️ عشان كده، مهم إن الأهل يكونوا على علم بالمخاطر اللي ممكن يواجهها أولادهم على الإنترنت ويقدموا لهم التوجيه والمراقبة اللازمة لحمايتهم.

🔴 ازاى تحمى اولادك من مخاطر الانترنت؟ 

⭕️ مهم جدا تفعيل خاصية الإشراف العائلي Parental Control على الأجهزة اللى بستخدمها اطفالك بيحميهم من التعرض للعنف والتحرش والتنمر الرقمي.

⭕️ في بعض التطبيقات عندها نسخة خاصة من برامجها للأطفال زي يوتيوب اللي بيوفر نسخة YouTube kids اللي بتكون مخصصة للأطفال وبتعرض لهم محتوى مناسب ليهم.

⭕️ كمان ممكن تفعيل الوضع الآمن restricted mode اللي بيحجب معظم الفيديوهات اللي بتروج لمحتوى غير مناسب للأطفال.

تفعيل الوضع الآمن سهل جدًا وبيتم من خلال (الدخول لحسابك على اليوتيوب، فتح الإعدادات، اختيار تفعيل restricted mode

أهمية تفعيل المصادقة الثنائية

⭕️ مش حنفكرك اد ايه الخطوة البسيطة دى حتساعدك تحمى تليفونك وكل حساباتك وتقللي فرص تعرضك للاختراقات والسرقات.

⭕️ المصادقة الثنائية او التحقيق بخطوتين، ودى معناها انك تأمنى حسابك زيادة بإضافة رقم تليفونك على الحساب، فيس بوك، انستجرام، تيك توك، يوتيوب، جوجل … أو اى حساب تانى عندك. بتدخلى على السيتينج وتضيفيه. 

⭕️ ولو حد حاول يدخل على حسابك، مش حيعرف، وحيوصلك مسيدج بكده، ولو حتى انتى حاولتى تدخلى حسابك من جهاز تانى، حيوصلك رقم كودى فى مسيدج على التليفون، لازم تضيفيه علشان يفتح معاكى الحساب.