١١ يوليو ٢٠٢٥
سيدات مصر

دليل الحماية على الانترنت

بسنت خالد، وهايدى شحتة ونيرة صلاح؛ التلاتة ضحايا للعنف الرقمى. التلاتة انتحروا بعد ما تعرضوا لتهديد وابتزاز على الانترنت، ودول نوع من أنواع العنف الرقمى. 

المجرمين سرقوا صور بسنت خالد وهايدى شحته من على حسابهم على السوشيال ميديا وفبركوها؛ وبالنسبة لنيرة صلاح، زميلتها في السكن فى الجامعة سرقت صور ومحادثات خاصة من تليفون نيرة وهددتها انها هتنشرها. 

اللى تسببوا فى انتحار البنات اخذوا جزاءهم، لأن الابتزاز الالكترونى جريمة ولها عقاب؛ ولكن للاسف الـ ٣ بنات ضاعت حياتهم علشان خافوا يبلغوا، وخافوا من كلام الناس، وخافوا من المجتمع، وخافوا من اهلهم … مع ان محضر للشرطة كان ممكن يساعدهم ياخدوا حقهم. 

العنف الرقمي هو لما الناس يستخدموا التكنولوجيا زي الإنترنت السوشيال ميديا عشان يسببوا اذى احد. العنف الرقمى له أشكال كتير، زي التحرش على الإنترنت، والتشهير على السوشيال ميديا، او الابتزاز ؛ او اى فعل مؤذى يتم باستخدام التليفون أو جهاز اللاب توب. 

🔴 تعملى ايه علشان تحمى نفسك  من الابتزاز الالكتروني؟

الإنترنت أصبح جزء أساسي من حياتنا، وعلشان كده مهم نعرف ازاى نحافظ على سلامتنا الرقمية، علشان بياناتنا متتسرقش ونتعرض للتحرش والابتزاز الالكتروني.  ممكن نحمي نفسنا بشوية  خطوات بسيطة. 

⭕️ متديش بياناتك الشخصية لحد

⭕️ اظبطى إعدادات الخصوصية للمواقع التي بتزوريها 

⭕️ استخدمى جوجل لما تحبى تدورى على حاجة على الانترنت علشان ده من المواقع الآمنة 

⭕️ خلى بالك قبل ما تعملى داونلود لأى لينك بيوصلك فى ايميل او مسيدج. 

⭕️ اختارى كلمة مرور (كلمة سر) قوية، مكونة على الأقل من  ٨ رموز وأرقام 

 ⭕️ خلى بالك جدا من “الفيشينج” أو التصيد، خصوصا  فى الايميل والمسيدچيز  على وسائل التواصل الاجتماعي. 

⭕️ اشتري من مواقع معروفة وموثوق فيها. 

⭕️ خلى بالك قبل ما تدوس على اى لينكات (روابط) عشان ممكن تكون فيها فيروسات.

⭕️ اعملى تحديث باستمرار لأجهزتك

⭕️ احتفظي بنسخة احتياطية من كل بياناتك وكلمات المرور

🔴 ما هو التنمر الالكتروني؟ 

التنمر الإلكتروني هو استخدام التكنولوجيا عشان نضايق أو نخوف أو نهدد أو نفضح حد. 

⭕️ التنمر الالكتروني بيحصل على السوشيال ميديا؛ زى فيسبوك، انستجرام، سناب شات، وتيك توك، او على المسنجر او واتس اب او تليجرام  او على الموبايل؛ وغيرها من التطبيقات دى.

⭕️ وده بيكون فى شكل نشر قصص كاذبة او مسيئة عن شخص معين؛  أو نشر صور وفيديوهات شخصية ممكن تسبب لها الحرج. 

⭕️ وممكن كمان بيكون فى شكل  مسيدچات فيها كلام او صور أو فيديوهات مؤذية أو مسيئة أو فيها تهديد. 

⭕️ المتنمر ملوش هدف تانى غير الأذية؛ سواء نفسية او معنوية أو مادية.

⭕️ ومهم نعرف ان التنمر الإلكترونى فى اى شكل من أشكاله سواء رساله او صور او ڤيديو او رسالة مسجلة، ممكن استخدمهم كلهم دليل ضد المتنمر. 

⭕️ لو في حد يتنمر عليكي، أول حاجة لازم تعمليها هي إنك تطلبي المساعدة من حد تثقي فيه زي مامتك او باباكى أو حد في العيلة، او مُدرسة تثقى فيها. 

⭕️ ولو كان التنمر بيحصل على السوشيال ميديا، خدى سكرين شوت بالرسائل اللي وصلت لك؛ واعملى بلوك (حظر) للشخص ده وبلغى عنه الفيس بوك او انستجرام او تيك توك، او اى منصة ثانية تعرضت فيها للتنمر.

🔴 الـ PHISHING او التصيد الالكتروني

الهاكرز كل يوم بيخترعوا طرق جديدة علشان يخترقوا حسابات ويستخدموا المعلومات اللي بيسرقوها في إيذاء أصحاب الحسابات دي. 

الـ PHISHING او التصيد،  أصبح من أكثر الحيل اللي يستخدمها الهاكرز  لاختراق الحسابات، وللأسف بيستخدموا تقنية عالية أحيانا يكون من الصعب كشفها.

ازاي بيتم اختراق الحسابات من خلال الـ Phishing ؟

يوصلك ايميل من شركة مشهورة أو بنك، يحذرك أن حسابك حيتقفل، او انك كسبت  خدمة أو فلوس، أو ان عليك فلوس لهم، أو أي طريقة ثانية يحاولوا فيها أنهم يوجهوكي انك تضغطي على رابط  موجود في الإيميل.

وفي الرابط ده بيطلبوا منك انك تحطى الباسوورد او رقم الكريدت كارد. الروابط دي بتوصل جهازك لمواقع بيقدروا من خلالها سرقة بياناتك.

علشان تحمي حسابك من الإختراق، بلاش تضغطي علي الروابط في رسائل البريد الإلكتروني اللي بتوصل  من أشخاص مجهولين؛ علشان ده ممكن  يعرض جهازك للخطر.

وفي حالة لو وصلك لينك في ايميل من حد تعرفيه، مش هتخسروا حاجة لو اتأكدتم بنفسكم من صاحب الايميل انه هو فعلا اللي بعته قبل ما تضغطوا علي اللينك، لانه هو نفسه ربما يكون كمان حسابه تم اختراقه، والهاكرز بيبعتوا ايميلات لأصحابه علشان يخترقوا حساباتهم هم كمان .

🔴 ازاى تختارى كلمة سر قوية؟ 

⭕️ إختيار كلمة سر password قوية هي أول حاجة  نقدر نحمي بيها بياناتنا و حساباتنا على الإنترنت 

⭕️ استخدمي دائما خليطاً من الأحرف والأرقام والرموز 

⭕️ وكل ما تكون طويلة كان افضل (متقلش عن ١٦ حرف) Dg1@-XF-$OL?2639

⭕️ استخدمى كلمة سر مختلفة لكل حساب ( علشان لو حصل تهكير حساب، الهاكر ميقدرش يوصل لباقي الحسابات). 

 ⭕️ بلاش تستخدمي معلومات شخصية فى كلمة السر، يعنى بلاش رقم تليفونك ولا عيد ميلادك ولا اسماء اولادك 

⭕️  بلاش تستخدمى الكلمات الشائعة زى “password”, “iloveyou”, الخ.

⭕️ بلاش تستخدمى التسلسل (زى: abcd1234) أو الحروف اللى ورا بعض على الكيبورد (زى qwerty).

⭕️ غيرى كلمة السر باستمرار

⭕️ متنسيش تكتبيها في مكان آمن بحيث تقدرى تلاقيها بسرعة وقت ما تحتاجى لها

🔴 آمنتى تليفونك النهاردة!

🔴 حماية تليفونك هي حماية لخصوصيتك ولأمنك الرقمى

⭕️ تعرفى ان اى ممكن اى حد يوصل لبيانات تليفونك لو معندكيش Screen Lock تأمين قفل شاشة التليفون.

⭕️ وبالرغم من أهميتها، اغلب الناس مش بتهتم أنها تأمن شاشة قفل التليفون.

⭕️ صحيح إن كتابة كلمة او رقم  مرور كل مرة عاوزة تشوفى حاجة على التليفون مزعجة جدا، بس هى خطوة مهمة علشان تحافظى على خصوصية تليفونك، وعلى أمنك الرقمى 

⭕️ تليفونك ممكن يضيع، ممكن تنسيه فى التاكسى، او فى كافيه؛ وممكن مديرك فى الشغل يندهك وتسيبى التليفون على المكتب؛ 

⭕️ لو معندكيش تأمين شاشة قفل التليفون، انتى بتدى بياناتك “هدية” لأى شخص عاوز يؤذيكى، لأنه فى غمضة عين هيقدر يوصل لكل حاجة على تليفونك: ملفاتك الشخصية، صورك، حسابك على فيسبوك، وتطبيقات التسوق. 

⭕️ ولو تليفونك حافظ كلمات المرور بتاعتك، الهاكر او الشخص اللى عاوز يؤذيكى هيقدر يدخل على أي موقع عندك، و يستخدم المعلومات الموجودة ضدك. 

⭕️ خطوات تأمين شاشة قفل التليفون بسيطة جدا ومش هتاخد منك خمس دقايق علشان تفعليها.

⭕️ افتحى تطبيق “الإعدادات” على تليفونك، وبعدين دوسى على “الأمان”، دوسى على قفل الشاشة واختارى طريقة القفل اللى تناسبك 

⭕️ اتبعى التعليمات على الشاشة.

🔴 ازاى تحمى نفسك على الانترنت؟

اول قاعدة فى استخدام الانترنت هى انك متضغطيش على اى لينك يوصلك فى ايميل او مسيدج لانها ممكن تكون برامج ضارة وتعرض جهازك للخطر؛ وعلشان كده: 

⭕️ اوعى تعملى داونلود لملف وصلك فى ايميل انتى مش مستنياه.

⭕️ مفيش حاجة اسمها حد بعت لكم ايميل يقول لكم انتم كسبتوا يانصيب واضغط على اللينك ده  

مفيش حد حيكسب جايزة مالية بدون سبب. دى حاجات بتخليكى تلغى تفكيرك وتضغطى على اللينك. 

⭕️ اوعى تنزلى ملفات وصلتك فى ايميل او مسيدج فيها اخبار مغرية او حصرية 

⭕️ اوعى تردى على ايميلات او رسائل بتطلب كلمة السر بتاعتك.

⭕️ اوعى تنزلى اى تطبيق او سوفت ويير او برنامج  للكمبيوتر او التليفون من مواقع غير رسمية علشان مجانية. 

اى حاجة بتنزل من مواقع غير رسمية بيكون متحمل عليها برمجيات خبيثة.

⭕️ حماية جهازك = حماية بياناتك = إنترنت اكثر أمان

🔴 في جرائم الإبتزاز الإلكتروني مش دايما المجرم غريب!

بنشوف كتير في الأخبار اليومين دول ان في شباب كتير بيتحكم عليهم بالسجن لتهديدهم بنات او سيدات كانوا علي علاقة بيهم في يوم من الأيام. الشاب ممكن يكون زميل، او صديق البنت قررت تقطع علاقتها بيه، او رفضت خطوبته. ممكن يكون خطيب سابق عاوز ينتقم لكرامته علشان البنت فسخت خطوبتها؛ ووصل الإجرام ان زوج سابق ممكن يهدد طليقته بصورها او فيديوهات خصوصية لها! 

وبيقوم الشاب بتهديد وابتزاز الضحية بصور حقيقية او مفبركة او تسجيلات صوت أو مقاطع فيديو، كوسيلة ضغط لإجبار الضحية علي الرجوع اليه بعد ما تكون أنهت العلاقة. 

بنات وسيدات كتير كسرت حاجز الخوف ومبقتش تسكت عن حقها، وبدل ما بقت تخاف وتضعف وتسمع كلام المجرم، أصبحت هي اللي بتبلغ عنه وبيتم القبض عليه.

كل بنت بتبلغ عن جريمة الابتزاز الالكتروني اللي بتتعرض لها، هي مش بس بتاخد حقها، هي كمان بتحمي غيرها من البنات.

لو تعرضتي لأي ابتزاز او تهديد وحتى لو كانت الصور و التسجيلات تخصك، مكتب شكاوى المرأة بالمجلس القومي للمرأة بيوفر الدعم القانوني و الاجتماعي و النفسي لضحايا العنف او الابتزاز – يمكنك التواصل معهم على رقم ١٥١١٥ للاستشارات القانونية. 

وكمان ممكن تتصلي بمباحث الإنترنت علي الخط الساخن ١٠٨، وهم حيرشدوكي على اقرب مكان تقدري تقدمي فيه البلاغ.

🔴 ازاى نتأكد من صحة المعلومات التي تقرأها على الإنترنت؟

⭕️ الإنترنت والسوشيال ميديا أصبحوا مصدر للأخبار والمعلومات لناس كتيرة اوى.

⭕️ هل بتفكروا قبل ما تشييروا لو الاخبار دى صحيحة ولا دى اشاعات؟ وايه الضرر اللى ممكن تحصل لو نشرنا معلومات مش صحيحة؟

⭕️ بس أولا لازم نفرق بين المعلومات الغلط والمعلومات المضللة.

⭕️ المعلومات الغلط هى التى بنشرها من غير ما تتأكد من مصدرها أو صحتها، والمعلومات دى بالرغم من انها ممكن تكون غير منطقية، لكن ، بسبب قلة الوعى، الناس بتنشرها من غير نية لإيذاء

⭕️  المعلومات المضللة بتتكتب وتتنشر مخصوص علشان تضر الناس، ويتم إعادة تداولها (تشييرها) من غير ما تتأكد من صحتها.

⭕️ صانعى محتوى المعلومات المضللة بيستخدموا الانترنت والسوشال ميديا علشان توصل والمعلومات المضللة لأكبر عدد من الجمهور.

⭕️ علشان كده من المهم قبل ما نصدق أي حاجة بنقراها ونشيرها، وخصوصًا لو كانت الأخبار أو المعلومات مش منطقية، لازم نتأكد من:

⭕️ المصدر: مين اللي كتب الخبر؟

⭕️ مين صاحب الحساب (الاكاونت) اللى نزل عليه الخبر؟

⭕️ هل الاسم اللى مكتوب على الاكاونت حقيقي ولا اسم وهمى؟

⭕️ هل الشخص صاحب الحساب ده له أصحاب ومتابعين كتير ولا لا؟

⭕️ التاريخ: الحساب أو الموقع اللى نزل عليه الخبر ده جديد ولا لا؟

⭕️ الموقع: هل موثوق فيه وله مصداقية؟ وهل محرري الموقع ده أشخاص حقيقية ولا لا؟

⭕️ الدافع: ليه ظهر المحتوى ده فى التوقيت ده؟

⭕️ هل المعلومات والأخبار دى منطقية ولا لا؟

⭕️ هل الخبر ده نزل على اكثر من موقع محترم وموثوق فيه، ولا لا؟

الحاجات دي بتساعدنا نتأكد إن المعلومات التي تقرأها صحيحة قبل ما نصدقها ونشييرها.

🔴 التعامل التجاري الآمن على الإنترنت 

🔴 معظمنا يستخدم الإنترنت علشان نشتري و نبيع و ندفع فواتير واشتراكات أونلاين، الحاجات دي كلها بتعرض حساباتنا البنكية للخطر. 

الخطوات البسيطة دى هتساعدك تحمى حسابك البنكى وتقليل فرص تعرضك للاختراقات والسرقات.

⭕️ مش حنفكرك بأهمية استخدام كلمات مرور طويلة ومعقدة وفيها حروف كبيرة وصغيرة وأرقام ورموز.  

وكمان بلاش تستخدمى نفس كلمة المرور لأكثر من حساب.

⭕️ المصادقة الثنائية أو التحقق بخطوتين، ودى معناها تأمين حسابك زيادة بإضافة رقم تليفونك على الحساب. 

⭕️ تابعي حساب البنك بانتظام عشان تقدرى تكتشف بسرعة أي نشاط غريب. 

⭕️ متفتحيش حساب البنك  وانتى بره البيت من شبكة واى فاى عامة فى محل او كافيه او نادى. 

⭕️ اعملى تحديث لتليفونك باستمرار علشان تتأكدي إن التطبيقات التي تستخدميها مفيهاش ثغرات ممكن الهاكر يخترق التليفون منها. 

⭕️ استخدمى التطبيق الرسمي للبنك بتاعك مش تطبيقات طرف تالت. التطبيقات الرسمية بتكون أكتر أمان وتضمن حماية بياناتك.

⭕️ وبرضه مش حنفكرك بلاش تفتحى اى لينكات بتوصلك فى رسائل

⭕️ اوعى تبعتى معلومات شخصية أو بنكية لأي رسائل غير معروفة أو مشبوهة. البنوك عمرها ما هتطلب معلومات حساسة بالطريقة دي.

⭕️ نزلي برامج مكافحة الفيروسات وبرامج الحماية على جهازك عشان تحمي نفسك من الفيروسات والبرامج الضارة.

🔴 تعملى ايه لو حصل اختراق حسابك البنكى؟ 

🔴 معظمنا يستخدم الإنترنت علشان نشتري و نبيع و ندفع فواتير واشتراكات أونلاين، الحاجات دي كلها بتعرض حساباتنا البنكية للخطر. 

طيب تعملى ايه لو حصل اختراق حسابك البنكى؟ 

⭕️ أول حاجة تعمليها هي إنك تتصلى بالبنك فورا وتبليغهم ايه اللى حصل وتطلبى تجميد الحساب  وتلغى الكارت عشان تمنعى اى معاملات ثانية تتم باستخدامه.

⭕️ لو لسه عندك إمكانية دخول حسابك، غير كلمة المرور بتاعتك فورًا واختار كلمة مرور جديدة وقوية.

⭕️ لو مش مفعلة خاصية التحقق بخطوتين، فعليها دلوقتي عشان تضيف طبقة أمان زيادة لحسابك.

⭕️ راجعى حسابك البنكي وشوف المعاملات الأخيرة عشان تقدرى تحدد المعاملات اللي انت معملتهاش، وتبلغى بها البنك.

⭕️ شغلي برنامج مكافحة الفيروسات وافحص جهازك بالكامل علشان تتأكدي إن مفيش فيروسات أو برامج ضارة ممكن تكون هى السبب في الاختراق

⭕️ تابعى حسابك البنكي بشكل منتظم في الفترة الجاية عشان تقدرى تكتشفى  أي نشاط غريب بسرعة وتبلغ عنه.

⭕️ لو بتستخدمى نفس كلمة المرور في حسابات تانية، غيرها فورًا عشان تحمى باقى الحسابات من الاختراق. 

🔴 الإجراءات دي هتساعدك تقللى الخساير اللي ممكن تحصل نتيجة اختراق حسابك البنكي، وكمان و تحمى حسابك البنكى وتقليل فرص تعرضك للاختراقات والسرقة فى المستقبل 

🔴 ازاي بيتم اختراق الحسابات بـ الـ فيشينج؟

🔴 التصيد او الفيشينج أصبح من أكثر الحيل اللي يستخدمها الهاكرز  لإختراق الحسابات، و بيستخدموا تقنية عالية جدا أحيانا يكون من الصعب كشفها.

⭕️ ازاي بيتم اختراق الحسابات بـ الـ فيشينج؟

⭕️ يوصلك ايميل من شركة مشهورة أو بنك، يحذرك أن حسابك حيتقفل، او انك كسبت  خدمة أو فلوس، أو أن عليك فلوس لهم، أو حجة تانية يحاولوا فيها انهم يوجهوكي للضغط على رابط  موجود في الإيميل.

⭕️ وفي الرابط ده بيطلب منك انك تدخلي الباسوورد او رقم الكريديت كارد. الروابط دي بتوصل جهازك لمواقع بيقدروا من خلالها سرقة بياناتك.

⭕️ علشان تحمى حسابك من الإختراق، بلاش تضغطي على الروابط في رسائل البريد الإلكتروني اللى بتوصل  من أشخاص مجهولين

⭕️ وفي حالة لو وصلك لينك مش مستنياه في ايميل من حد تعرفيه، مش هتخسرى حاجة لو اتأكدي بنفسك من صاحب الايميل انه هو فعلا اللي بعته

 لأنه هو نفسه ربما يكون كمان حسابه تم اختراقه، والهاكرز بيبعتوا ايميلات لأصحابه علشان يخترقوا حساباتهم هم كمان

🔴 كيف تتخلصي من جهازك القديم؟

بياناتك مش بتتسرق بس لو حد اخترق جهازك، دى ممكن كمان تتسرق من جهاز اشتراه حد منك أو وديتيه لمركز صيانة عشان يتصلح! 

علشان كده، مهم جدا قبل ما تبيعي أو تتخلصي من جهاز كمبيوتر قديم، أو موبايل، أو أي جهاز تاني مخزن عليه بياناتك، تتأكدي انك مسحتي كل بياناتك وأي معلومات شخصية أو سرية عليه، و تمسحيها بشكل نهائي وترجعيه لإعداداته الأصلية.

يعني الجهاز يروح لمركز الصيانة أو للمشتري الجديد وهو نظيف تماما.

وكمان، افضل طريقة علشان تتخلصي من فلاشات أو سيديهات أو أي أجهزة تخزين تانية، هو إنك تحطيمها قبل ما ترميها.

🔴 هل تطبيقات ومواقع الجواز اون لاين آمنة؟

⭕️ الإنترنت غير بشكل كبير طريقة الجواز التقليدية، وخصوصا بعد ما ابتدت تنتشر مواقع وتطبيقات التعارف والجواز أونلاين، واللى بنات وشباب كتير فعلا استخدموهم علشان يلاقوا شريك حياتهم

⭕️ المواقع والتطبيقات دى بتوفر وقت وبتدي خيارات كتير، وده اللي بيدور عليه الشباب دلوقتى. لكن المواقع دى كمان تعرض مستخدميها للجرائم الالكترونية والنصب والاحتيال.

⭕️ هل فكرتي في المخاطر اللي ممكن تتعرضي لها لو استخدمتي المواقع دي من غير ما تعرفي أساسيات الأمان الرقمي والنفسي؟

🔴 من أكثر المخاطر اللي ممكن تقابليها على مواقع الزواج أونلاين:

⭕️ الابتزاز الإلكتروني

⭕️ التشهير

⭕️ انتحال الشخصية

⭕️ الاحتيال الإلكتروني: النصابين بيعملوا حسابات مزيفة على مواقع الجواز اون لاين  ويصوروا نفسهم انهم في مجالات ومناصب مرموقة. ويكسبوا ثقة السيدات من خلال رسائل أو تليفونات. 

⭕️ علشان كده المواقع دي ممكن تكون خطيرة جدًا، لأن التعارف من خلالها ممكن يوصل للابتزاز الجنسي أو المالي أو حتى لجرائم حقيقية، لان النصابين يستغلوا رغبة  الضحية فى الجواز والاستقرار ويستخدم المواقع دى عشان يوقعوا بها.

🔴 ومن أجل سلامتك وانتى بتستخدمى المواقع دى:

⭕️ حافظى على خصوصيتك والمعلومات الشخصية عنك تكون في أضيق الحدود.

⭕️ متتواصليش مع ناس مجهولة.

⭕️ متضغطيش على أي لينكات يبعتهالك الطرف التانى، ولا اغنية رومانسية ولا إعلان ولا اى حاجةً تانية. 

⭕️ ما تبعتيش فلوس أو تقدمي مساعدة مالية لحد اتعرفتى عليه اون لاين.

⭕️ وافتكرى دائماً ان اى حاجة قلتيها او بعتيها اون لاين ممكن تستخدم ضدك. ما تبعتيش صور او فيديوهات شخصية ليكى.

🔴 تعرفي ايه عن الـ Catfishing؟

🔴 مصطلح Catfishing بالإنجليزي ملهوش علاقة بصيد القطط. الكات فيشينج معناها انتحال شخصية مزيفة اون لاين، علي صفحات التواصل الإجتماعي.

⭕️ نصابين بينتحلوا شخصية مزيفة ويستخدموها للنصب والاحتيال 

⭕️ المجرمين بيشتركوا بأسماء وصور مزيفة على مواقع التعارف والدردشة وصفحات التواصل الاجتماعي، وتطبيقات الجواز اون لاين، ويعملوا علاقات عاطفية  وهمية، ويوعدوا الضحية بالجواز، وبعد ما بيعرفوا أسرارهم وبياخدوا  صورهم الخاصة بيبتدوا يبتزونهم 

⭕️ الكات فيشينج هو نوع من أنواع العنف الإلكتروني، وبالرغم من ان مفيش قانون ضد انتحال شخصية مزيفة أون لاين، ولكن الـ Catfishing في أغلب الأحيان هو الخطوة اللي بتسبق الإبتزاز الجنسي، واللي هو جريمة يعاقب عليها القانون.

🔴 دي علامات  إن الشخص الذي تتواصلي معاه شخصية مزيفة: 

⭕️ معندهوش أصدقاء أو متابعين كتير على حسابه

⭕️ بيتهرب من أي اتصال تليفون أو فيديو

⭕️ صورة البروفايل رسمية ومش بيغيرها، ومش هتلاقى له صور سيلفى

⭕️ بيرفض المقابلة وغالبا الحجة انه بيشتغل بره 

⭕️ يعترف بإعجابه أو حبه لكي بسرعة جدا

⭕️ حكاياته ملخبطة 

⭕️ بيطلب منك فلوس 

لو في حد من اصدقائك على صفحات التواصل الإجتماعي أو غرف الدردشة ينطبق عليه المواصفات دي، اعملي له بلوك علي طول. ده شخصية مزيفة غرضه ايذائك، بس منتظر الفرصة المناسبة. 

🔴 دى رسالة تهديد حقيقية اتبعت لصفحة على فيس بوك و فيها لينك مفخخ 💣

⭕️ لو وصلك رسالة كدة اوعى تضغطى على اللينك

⭕️ لو فاكرين، اللينك المفخخ زى ما قلنا قبل كده هو اللى لما تدوسي عليه بتفتحي الباب للهاكر عشان يخترق تليفونك.  

🔴 طيب ايه حكاية الرسايل دى؟  

⭕️ فى رسايل كتير على فيس بوك بتوصل لحسابات شخصية او صفحات بيزنيس بتهدد  ان فيس بوك قرر يقفل الحساب علشان أصحابه نشروا بوست يتعدى على حقوق ملكية أو علامة تجارية، او لاى سبب تانى! 

⭕️ الرسالة كمان بتقول ان لو فى سوء فهم حصل وانت  حاسس انك معملتش حاجة غلط، ابعت تظلم على اللينك ده. 

⭕️ والرسالة بتكمل انك لو مبعتيش التظلم ده، فهم اسفين هيضطروا يقفلوا الحساب.

💥💥 طبعا مش حنفكرك ان اللينك الموجود فى الرسالة هو لينك “مفخخ” واول لما تدوسى عليه الهاكر  يخترق تليفونك ويوصل لصورك ومسجاتك وبياناتك. 

🔴 ايه الكلام ده!!!  دى الرسالة بتقول انها من شركة “ميتا” اللى هي صاحبة فيس بوك؟ 

⭕️ ولو .. اوعى تدوسى علي اللينك برضو. دى رسالة بيبعتها الهاكر بمنتهى البساطة لكل حساب فى بلاقيه فى طريقة وينتظر لغاية ما حد يقع فى الفخ ويدوس على اللينك. 

⭕️ وافتكرى دايما ان “شركة ميتا” مش هتبعت لحد رسالة لحد فى انبوكس من حساب على فيس بوك!!

🔴 صدقوا المثل اللى بيقول الحداية مبترميش كتاكيت !! 

⭕️ مفيش حد متعرفهوش، او حتى تعرفه هيبعت لك مسيدج يقول لك هدفع مبلغ خيالي كل اسبوع علشان تنزلوا اعلان على صفحتكم! 

⭕️ وطبعا الرسالة اللى بتوصل بتكون من بروفايل ست جميلة او رجل وسيم! 

⭕️ المبالغ الوهمية اللى بتتكتب دى هى فخ علشان تلفت انتباهكم علشان تردوا على الرسالة

🔴  طيب بيحصل ايه لما تردوا على الرسالة؟ 

⭕️ بعد أخد وعطا فى الكلام، حيطلبوا منكم رقم التليفون علشان يحولوا لكم المبلغ، وبعدين هيبعتوا لكم مسيدج على التليفون عليها اللينك اللى المفروض فيه بيانات التحويل 

⭕️ وطبعا اللينك ده مفخخ، اول ما تدوسوا عليه الحساب بيتم اختراقه، ومع وجود تليفونك معاهم، بيتم فى ساعتها تغيير كلمة السر لحسابك، ولاى حساب تاني متأمن برقم التليفون. 

🔴 الخلاصة: بدون تفكير لو وصلك اى رسالة فيها عرض بمبالغ نقدية. بلوك بلوك بلوك على طول