الثلاثاء 24 يناير 2017

بحكم دراستها الفنية، تعشق رانيا وفيق أعمال كبار الفنانين مثل فريدا كاهلو بابلو بيكاسو و ليوناردو دافنشي و فان جوخ و سيزان و سلفادور دالي، كما أنها  تحب قراءة سيراتهم الذاتية لتتمكن من فهم لوحاتهم و أسلوبهم الفنى و الذى هو انعكاس  لحياتهم الخاصة.  رانيا إلى جانب عملها كمصممة ومبرمجة أفلام تطريز  باستخدام الكمبيوتر، وعملها كمدرسة تربية فنية فى معهد فتيات سمنود الازهرى لمرحلة الاعدادى و الثانوى، لديها أيضا مرسم تعلم فيه الاطفال و السيدات الرسم فى فترة الاجازة الصيفية.

 كيف و متى بدأ اهتمامك بالفن؟
من و أنا صغيرة كنت بحب الرسم و الاشغال الفنية، و كان دايما رسمي أحسن رسم فى الفصل فكانت مدرستى فى الابتدائي بتشجعني وبتنمي موهبتي، ومن كتر حبى للالوان كنت بأمضى أغلب وقتى فى المدرسة فى حجرة الرسم. كانت خبرتي بسيطة فى الخامات و الالوان،  بس كنت منبهرة بكل حاجة حولى، كان عندى فضول انى أعرف و أستكشف كل حاجة فى حجرة الرسم من خامات و أدوات،  لحد ما ربنا وفقني و دخلت كلية التربية النوعية قسم فنون .. كنت حابة دراستي أوي و كنت حاسة إن ده توفيق من ربنا إني أدرس فى المجال اللي بحبه.

 قبل عملك كمدرسة رسم، اين عملتى كمصصمة برامج تطريز؟
بعد تخرجى عام 2003 من كلية التربية النوعية قسم فنون جامعة طنطا ، حصلت على عمل فى مصنع ملابس كمصممة  للرسومات و الموتيفات التى تطرز على الملابس، و جذبنى العمل على الكمبيوتر جدا و لرغبتى فى استكشاف برامجه فقد تعلمت تحويل الرسومات الى أفلام تطريز.

 متى بدأتى مهنة التدريس؟
بعد ما أشتغلت فى مجال التصميمات لمدة سنة ، جالى التعيين كمدرسة تربية فنية عام 2005،  وطبعا كان عليا أختار وظيفة من الاتنين علشان المواعيد،  بس علشان كنت أثبت كفائتي فى مجال تصميم أفلام التطريز، قرر صاحب المصنع اني أكمل معاهم وأشتغل بعد ما أخلص شغلي في المدرسة. وإستمر بيا الحال ده لغاية دلوقتى، مع تغيير المصانع و الاشخاص.

 من بين كل المشغولات و الفنون اللى بتنفذيها؟ ايه اكتر حاجة قريبة من قلبك؟
أنا بحب جدا الفن الشعبي، لانه فن بسيط و مبهج و تلقائي، وكمان مصر مليانة موتيفات شعبية ، كمان مصر فيها بيئات متنوعة،  بيئة صحراوية و ساحلية و زراعية و كل بيئة لها رموز و موتيفات خاصة، ده طبعا بالاضافة الى ان مصر عدي عليها عصر فرعوني و قبطي و روماني و اسلامي و كل عصر منهم له خصائص فن معينة. مصر هى البلد الوحيدة فى العالم اللي فيها كل الميكس الجميل ده.

أنا عملت لوحة جدارية سميتها ملامح مصرية، و دي فعلا اكتر عمل مميز ليا و حاولت أحط فيها كل الموتيفات الشعبية.و كل الحاجات اللي مش ممكن تلاقيها غير فى مصر، زي عروسة المولد اللى نصها عروسة مولد و نصها فلاحة و المآذن و الفارس و البيوت الريفية و الفانوس و القله و الساقية و الكف و الحمام و النيل و الاهرامات و الحلق الشعبي و التنورة. استخدمت فيها خامات كتير زي الخشب و النحاس الخيش و الفوم و المرايات المكسرة و القماش و الترتر و الوان الزيت و عجينة السيراميك.

 ايه من ادواتك الفنية اللى متقدريش تعيشى من غيره؟
الخامات اللي بحب اشتغل بيها وهي الخامات المستهلكة.  أنا بالنسبة لي الفنان الحقيقى لازم يكون له من الذكاء انه يعرف ازاى يعمل  فن جميل من خامات مستهلكة،  وانك لما تشوف العمل الفني متعرفش أنه مصنوع من الخامة المستهلكة البسيطة دي.
 
ازاى جت لك فكرة  المرسم ؟
جائتنى  فكرة المرسم لأنى عايشة فى مدينة صغيرة جدا مفيهاش أي مراكز للأنشطة أو قصر ثقافة .. و كنت عاوزة أوفر للاطفال الفرصة لتنمية مواهبهم، و اللى أنا كان نفسى و أنا صغيرة ألاقى مركز أو مكان يوجهني و يعلمني الرسم و الأشغال بشكل ترفيهي محبب. والموضوع نجح جدا و أصبح المرسم مشهورة جدا فى بلدي لأنه كان فكرة جديدة و غريبة علي الناس، و فى نفس الوقت نبهت الناس إن مفيش أي مكان تعليمي أو ترفيهي فى المدينة يعلم الأطفال النوع ده من الأنشطة، و خاصة إنهم فى الاجازة بيكون عندهم وقت فراغ كبير ومفيش اي مكان يتعلموا فيه حاجة مفيدة .. فكان الإقبال علي المرسم جامد جدا، خصوصا ان تعليم الرسم و الأنشطة ف المدارس بقي للاسف مهمل لعدم وجود ميزانيات.

هل المرسم مفتوح طوال العام؟ وايه المشغولات او الفنون اللى بتعلميها للاطفال؟
المرسم مفتوح فى الصيف بس لإنشغال الطلاب بالمدارس و أنا كمان مش بيكون عندى وقت كافى. أنا باأجر المكان فى الصيف و بنجهزه باالمقاعد و أدوات الشرح و خامات الشغل. المرسم مفتوح لتعليم الأطفال من الأولاد و البنات  وفى فصول للكبار، بنات و سيدات. أنا  باأعلمهم كل اللي أعرفه ، زى الرسم بالرصاص و بالزيت و الفحم، والأشغال الفنية زي شغل عجينة السيراميك و عجينة الورق و الطباعة و اشغال بالورق و الرسم بالجليتر و التشكيل بالفوم و البذور.
فى كمان بعض زميلاتى فى المدرسة من الموهوبات فى مجالات أخري إنضموا للمرسم و بيعلموا السيدات و الأطفال أنشطة أخرى زى الخط العربي و التطريز بالستان و أشغال الخرز و الكروشيه و عمل المكرميات و الايتامين و اللآسيه و الاكسسوارات و فوانيس من القماش و الخرز و الكورشيه و الاكسسوارات.
 

فى رأيك ايه أهمية الفنون فى حياة الناس؟
الفنون مهمة جدا فى حياة الناس، بالنسبة للفنون التشكيلية اللي بتعتمد علي الرؤية فهي متعة للعين و الفكر .. يعني مثلا لو أنا متضايقة و شفت لوحة جميلة جدا اكيد حا أحس بالبهجة. لو الاستمتاع بالجمال مش شيئ مهم مكنش ربنا خلق الورد أو أسماك الزينة أو الألوان، وكان خلق المخلوقات اللي ليها وظيفة نفعية فقط .

كمان الفن التشكيلي و الرسم وسيلة لعلاج بعض الأمراض النفسية،  و ده ثابت فى أبحاث كتير ان المريض النفسي بيعبر عن كل الاحاسيس اللي جواه من خلال الرسم، زي ما كان بيحصل مع فان جوخ، و الرسم أحيانا بيكون سبب فى إقبال الاشخاص علي الحياة زي ما حصل مع فريدا كاهلو بعد كسر عمودها الفقري و بتر رجلها،  و كان الرسم هو متعتها الوحيدة اللي كانت بتتغلب بيها علي الالم.

ليه ممارسة الفنون المختلفة  زى الرسم و الاعمال اليدوية مهم فى حياة الاطفال؟
و بالنسبة للاطفال، استخدام الادوات الفنية و الخامات بينمي مهاراتهم و ذكائهم. تعليم الفنون  بيساعد الطفل انه يركز و يحدد نسب علشان يقدر يرسم و يميز الألوان و يحدد الألوان المناسبة اللي ممكن يحطها ف الرسمة علشان تطلع جميله ، و لو هو موهوب بيتحول الى مبدع او مخترع.  كمان الرسم بيخلي العين تشوف النسب صح وبيعمل توافق بين العين اللي بتشوف و المخ اللي بيترجم و الايد اللي بترسم .. مش كل الاستفادة بتكون من المذاكرة، الطالب بيستفيد كمان من الرياضة و الرسم و الانشطة المختلفة.

 ازاى بتقدرى تستغلى الميزانية الصغيرة للمدرسة لانتاج هذا الكم من الاشغال؟
ميزانية المدرسة فعلا بتكون بسيطة، يادوب باشترى بيها  ألوان و غرا .. دول أكتر حاجات مينفعش أستغني عنهم .. أما باقي الخامات بتكون من الخامات المستهلكة اللي مش مكلفة زي نشارة الخشب أوقصاقيص قماش أو علبة أحذية فاضية  أو المرايات المكسورة أو زجاجات بلاستيك فارغة .. و كل الحاجات دي بتوفرها الطالبات أو بوفرها أنا من مخلفات البيت.

 ايه العمل الفنى اللى انتى شغالة فيه حاليا؟
و الله دلوقت بجهز لمعرض المدرسة  و بعمل لوحة فن شعبي من قصاقيص القماش بطريقة الخيامية و بعمل لوحات من بواقي الخشب و الزجاج المكسر و الالوان و الغرا.

 من كل اشغالك اليدوية، ايه الشغل المفضل ليكى؟
انا بحب كل شغلي جدا سواء الرسم او الاشغال الفنية

لو المادة و الوقت مش مشكلة، ايه المشروع اللى تحلمى بتنفذيه ؟
بحلم يكون عندي ورشة أصمم فيها مكملات ديكور .. و لوحات شخصية للعرض فى المعارض .. و بحلم يبقي عندي مصنع ملابس أصمم فيه ازياء تراثية جميلة مواكبة للعصر. و باذن الله بحاول اوفر المكان و هحقق دا قريب.