ماذا ترتدين لحضور مقابلة عمل أو إجتماع مهم؟

١٥ مارس ٢٠٢٣
كتبت رضوي حسني

اختيار الزي المناسب وباقي التفاصيل لحضور مقابلة عمل أو مناقشة تخرج أو اجتماع مهم دايمًا بتكون نقطة محيرة لكتير من البنات، بعضهم مش بيكون قادر يحدد إذا كان الزي ده مناسب للمناسبة الرسمية ولا لا، هل المكياج مناسب وقصة الشعر ملائمة وغيرها من التفاصيل..

علشان كدة جمعنالكم بعض النصائح لاختيار الزي المناسب للحدث الرسمي وطبعًا باقي التفاصيل..

اختاري الألوان المحايدة في البدل زي الرمادي أو الأزرق الداكن، كمان النقشات البسيطة زي المقلم أو المخطط، وبلاش الألوان الفاتحة جدًا لأنها مش مناسبة.

وابعدي عن الأقمشة المطرزة أو اللامعة أو اللي نقوشها كتير.

لو حتلبسي جيب لازم تكون أطول من الركبة ومش قصيرة أو مفتوحة بشكل ملفت.

لو هتلبسي فستان يُستحسن يكون طويل، مش مكشوف ولا ضيق وبلون محايد.

البنطلون لازم يكون مناسب لطولك مش طويل للأرض أو قصير زيادة وطبعًا ابعدي عن الجينز والجلد والموديلات الكاجوال واختاري بنطلون كلاسيك.

ابعدي عن اللبس الضيق أو الواسع بشكل مبالغ فيه و اتأكدي إن اللبس نظيف تمامًا مفيهوش أي بقع أو علامات.

ابعدي عن الألوان والنقشات والأشكال البراقة الملفتة في الأحذية اختاري الأحذية بألوان محايدة زي الأسود، البني أو البيج وبكعب ميزدش عن 3 سم يكون مقفول من قدام وابعدي عن الصنادل والأحذية المفتوحة الملونة.

والشنط واختاري ألوان محايدة بسيطة.

اختاري بلوزة بسيطة بألوان كلاسيكية زي الأبيض أو الأزرق الفاتح وابعدي عن الموديلات اللي تفاصيلها كتير أو ألوانها صارخة.

أكمام البلوزة أو الجاكيت لازم تكون بتنتهي عند المعصم مش طويلة أو قصيرة.

اختاري قصات الشعر البسيطة مفرود أو ديل حصان أو كعكة وابعدي عن القصات الملفتة.

ابعدي عن الإكسسورات المبالغ فيها لأنها مش مناسبة لطبيعة الحدث وخليكي بسيطة.

التزمي بالألوان الدافئة (النود والبينك ..) في المكياج  وابعدي عن الألوان الصارخة زي الأحمر والألوان الغامقة.

أما العطور فاختاري العطور الهادية البسيطة وابعدي عن الألوان الفواحة التقيلة.

خدي بالك من أن أي قطعة من الملابس الداخلية تكون ظاهرة بشكل غير مقصود.

وأخيرًا افتكري أن البساطة والكلاسيكية والشياكة هما دايمًا أول اختيارات الزي الأنيق المناسب.

**إذا أعجبتك هذه المقالة، أشترك في المجلة لتصلك مقالاتنا في بريدك الالكتروني



أضف تعليق